Matthew 27
Sudas Rendem Tisa Usil Asa koa Mumoni min Iesu ka Sar Koteh Hiren a
1En visokon semau, asuv keil onen pris keil ka elda keil onen Siu keil, keil vasi umai en rendemien tas keke avouas Iesu vamat. 2Sakini, apar kati ka amulamuni va ven asuv Paelet, avat ten kavmen en out enek, keke avasa lati mini. ▼3Navong Sudas koa sa lat Iesu lesi keke amae lat moulien onen Iesu keke avouasi vamat, kei viles rendemien onen ka sak visi vasan ris silva mane hanumau tai ka halualim (30) min asuv keil onen pris keil ka elda keil. 4Kei vit lat kei min keil vit, “Inau namumon tisaen, veni nasa lat meatin tai hemat koa romumon etai tounah vatisa.”
Ka keil avit kesi mini avit, “Komai emairovattei mevailea. Koanek mul enuk.”
5Sakini Sudas rivin mane netan en teahu ten Eim Votut ka muloh va. Evus, va ka par koteh hiren en viau ka murur.
6Asuv keil onen pris keil umai alah lat silva mane keil enek ka aviteni avit, “En mengkatien orer, romaltei rovaling mane enek vaha en ateli ten Eim Votut veni mane enek romutotei, avul lat moulien onen meatin tai eni.” 7Aselus usili ka umai en rendemien tas. Sakini, akur mane enek ka uva ales meatin koa mumon tounah keil en tanvili. Ral min mane enek, avul hati atan rani keke avoumon out tatetahinien tai eni keke avatahin heou keil eni. 8Ven koanik, out enek amul avise en 'Atan ten Ara' rokol kosa. 9Evus, asa koa Ahi viteni ka en provet Seremaea mai vi anatin koa vit,“Keil akur silva mane hanumau tai ka halualim (30), mal en mane koa me-Isrel keil alingi vi hulien ten moulien onen. 10Ka ral min mane enek, avul hati atan ran meatin koa mumon tounah keil en tanvili, suval koa Ahi Asuv meng kat inau eni.”(Sak 11:12-13; Ser 19:1-13; 32:6-9)
Iesu Mulomal en Meten Asuv Paelet c
11Navong koanik mul kur out, Iesu mul mulomal en meten asuv Paelet koa vi avat ten kavmen ten out enek. Ka Paelet visi vit, “?Mukave? ?Anatin keke kovi asuv houlu onen Siu keil?”Iesu vit kesi vit, “Suval koa koviteni.”
12Ka navong asuv keil onen pris keil ka elda keil aselus va kati, kei rovit kes etai tounah vakataun usite onen. ▼ 13Sakini Paelet visi vit, “?Keik korraengontei selusien houlu koa keil amul aviteni vakatuk?” 14Ka Iesu ro raeng mules, rovit kes etai selusien one. Navong asuv Paelet les sakien onen, muti manin houlu.
15Vi sakien matu onen asuv Paelet keke en avong ten Anien ten Mul Laui, hemae lat meatin tai koa meatin keil arie lati keke va sital ran eim takeih. 16En avong enek, lariken tai mul en eim takeih, isen Barabas koa meatin keil akilea en tounah keil tatisa koa mumoni. 17Sakini navong asuv Paelet lesi keke mari vangi meatin keil alah ruai, vis keil vit, “?Koa kave emivati mamaeni vasital: Barabas vuo Iesu koa avise en Kristo?” 18Kei visi mukonek veni lei kilea tuai keke asuv keil onen pris keil asa lat Iesu mini veni amul avielu eni.
19Ka navong Paelet mul veah rondan en kot onen, ahin onen san selusien mai mini vit, “Konoumon etai tounah naha kat meatin enek veni kei mal revi. Kosa, namundemko houlu ven matil vovoien tai koa nalesi usil meatin enek.”
20Ka asuv keil onen pris keil ka elda keil aleh rendemien onen vangi meatin keil keke avahis Paelet hemae lat Barabas vamaluv, ka uas Iesu hemat.
21Paelet va vis vangi meatin keil enek vit, “?Koa kave en keilu emivati mamae lati vamaluv?”
Ka keil avisohiso avit, “!Barabas!”
22Paelet vis keil vit, “?Hemukonek, numon asa en Iesu koa avisi en Kristo?”
Keil vasi avisohiso avit, “!Ti kati en aiveave!”
23Ka Paelet vis keil vit, “?Vensa? ?Kei mumon sa tisa?”
Ka avisohiso keih imok avit, “!Ti kati en aiveave!”
24Navong Paelet lesi keke sakras vahiles rendemien one ka vesesal avoumon rea, kei kur oai ka kas hen en meten meatin vasi keil. Ka navong mumoni, viteni min keil vit, “Kosa, nakas motein hek ran ara ten matien onen meatin ekek veni, en metok, romumon etai tounah keke vamat veni. !Sakini, munak hemat, ara onen hel en hemi enges!”
25Ka vangi meatin keil avit kesi avit, “!Tahos, ran hel en hemai ka en hen titamai keil!”
26Sakini, musil envatien one, Paelet mae lat Barabas sital, ka meng kat meatin tavaeen keil onen avatah Iesu en viau takan ka avalamuni vahina avati kati en aiveave.
Meatin Tahuen Keil Amumon Tohtohien en Iesu e
27Navong amutah Iesu evus, meatin tavaeen keil onen Paelet amulamuni va en teahu ten mari eim ome ka avise ruain meatin tavaeen sav keil en out enek umai. 28Keil asakit lat eisin omon Iesu ka akav koe en kaliko tai koa vilhili suval omon asuv houlu tai. 29Evus, keil amumon tohtohien eni. Avil vatluvoluv en viau koa sin tetaveah mul ien ka alingi en vatin. Aling eisal tai en hen matu ka aretengeiril en meten suval avouhou mini. Ka navong amumoni aviteni avit, “!O asuv houlu onen Siu keil, mevouhou venuk!” 30Evus, amutiv kati ka asakit lat eisal rani ka amuas vatin eni. ▼ 31Navong amumon tohtohien mini evus, akulat kaliko tahilhili rani, ka amusin eni en eisin kati omon. Evus, amulamuni keke avati kat en aiveave.Amuti Kat Iesu en Aiveave g
32Navong meatin tavaeen keil amulamun Iesu uva, ales meatin tai mul en sise, isen Saemon ten out Saerin. Meatin tavaeen keil umai veni ka akeih kati vahus aiveave onen Iesu. 33Amulamun Iesu vina en Hou Kolkota koa aneite teni vi 'Out ten Asi ten Avat'. 34En out enek, asan uaen min Iesu koa avilesi ral min tounah koa kun. ▼ Ka navong Iesu mun visi, seseini. 35Evus, amuti kati en aiveave. Navong mul murur, ason daes keke avatiti eisin keil omon min keil. ▼ 36Ekonek, keil arondan ka alei kokoe. 37Ka en aiveave onen, nesa en vatin, aling tisien tai koa amutisi eni avit, 'Koanik vi Iesu, Asuv Houlu onen Siu keil.' 38En avong enek, amuti kat tarhena elu ral mini, tai en usiven matu ka tamun en usiven meil. ▼39Navong murur en aiveave, meatin keil koa amual vesesal veni akalialin vate ka amunge kat Iesu 40avit, “!Ei, keik koa kovit ku rasilin Eim Votut ka kum risi en avong hetel enges, hetahos imok keke kikataun vis keik sasom enges! !Munak kovi Natin Ahi anatin, kisuvul ran aiveave enek!” ▼
41En vati sakien enek, asuv keil onen pris keil, tiser keil ten mengkatien onen Mosis, ral min elda keil emun amumon tohtohien min Iesu. 42Keil amumon tohtohien mini avit, “!Alles visi! Kei kilea vakataun meatin sav keil, ka sakras vakataun kei sasen. !Munak anatin keke kei vi asuv houlu onen me-Isrel keil, hemita netan ran aiveave koanik kosa. Hemukonek, ir rehekul anatin esuk eni. 43Kei ling desien onen en Ahi ka viteni vit, 'Inau navi Natin Ahi.' Tahos, munak Ahi envat meatin eke, kei hemai hekatauni.” 44Ka en vati sakien enek, tarhena keilu koa amuti kat keilu en usiven keilu, keilu emun luselus kareni.
Matien Onen Iesu l
45En taviai varei, mankoli mai mutaluh koe out vasi haoa etel. 46Ka navong haoa etel enek evus, Iesu visohiso keih en selusien kati onen koa vi Arameak vit,“!Ilae! !Ilae! ?Lama sabaktani?”(Sam 22:1) Aneite ten selusien enek vi, '!Ahi onak! !Ahi onak! ??Vensa kosokoveinau??'47Navong meatin tei keil koa amulomal en out enek araengoni avit, “?Milonge? Kei mul vise provet Ilaetsa.”
48Hatte tas, tai en keil muloh, kur soke kaliko tai, ka kasi en uaen takun. Evus, lingi en kele ai tai ka sani vina min Iesu vasimi. 49Ka tei sav en keil aviteni avit, “Veitir mau ka rovales visi. ?Ilaetsa hemita hekatauni, vuo hermaitei?”
50Evus, Iesu mis roha, leh kor en eang, ka mat.
51En hati avong enek, kaliko koa matetel koa aleh koe hati out koa vi votut en Eim Votut, sipasi elu en ngolite nesa vita varei rokol ngolite netan. Alu mulu ka ahat keil apas 52ka sakin avul tetahinien sipasi mutah. Meatin houlu onen Ahi koa umat amul ien, keil amoul eris ran matien. 53Keil asital ran avul tetahinien one ka amual. Ka navong Iesu mun moul eris ran matien, meatin houlu ales meatin keil enek en out Serusalem koa vi taon votut onen Ahi.
54Navong avat onen meatin tavaeen keil ka meatin keil onen koa alei kokoe en Iesu alonge alu mulu ka ales tounah vasi koa kur out, keil ametau houlu ka aviteni avit, “!Anatin eli, kei vi Natin Ahi varei!”
55Ka ahin houlu avati keil soutin neli ran aiveave ka amul ales tounah koa kur out. Vangi ahin keil enek akataun Iesu navong mum en out Kaleli ka amusili umai en out Serusalem. 56Ka en koakeil enek, keitel telvi Meri ten out Maktela, Meri mama onen Tiemes ka Siosep, ka mama onen natin Sepeti keilu.
Aling Iesu Va en Valengeihat Tatetahinien m
57Vesesal out vavong ka Sabat vamai. Sakini meatin tai ten out Aramatea koa tounah onen houlu mai ven asuv Paelet, isen Siosep. Kei mun vi tai en koakeil amul amusil kat Iesu. 58Navong mulomal en meten Paelet, visi vamaen teiai onen Iesu mini. Sakini Paelet meng kat meatin tavaeen keil onen uva akulati ka asani mini. 59Sakini Siosep kuri ka kav koe en kaliko taoh koa muto. 60Evus, Siosep vusi ka lingi en valengeihat tatetahinien kati onen koa arei meseni tuai vi heite hau. ▼ Evus, rein mari ahat tai koteh koe voiteh ten valengeihat enek ka lokoveini va. 61Meri ten out Maktela ka Meri tateisav lumul lurondan soutin neli en out enek, mal en voiteh ten valengeihat.Meatin Tahuen Keil Alei Kokoe en Valengeihat koa Teiai Onen Iesu Mul Ien
62Out mulan en Sabat, asuv keil onen pris keil ka Farasi keil uva avales Paelet. 63Umai veni ka aviteni avit, “Asuv, memundem kati keke navong meatin taliluvosien enek moul veah kei viteni vit, 'Avong hetel evus, inau nimoul eris ran matien.' o 64Sakini, keik kimeng kat meatin tavaeen keil onom iha ilei kokoe revi en valengeihat tatetahinien onen hetokol avong hetel heli heha. Veni munak kirmumontei, vahera meatin keil onen iha ka ihenan teiai onen. Vasakini, akilea avahiteni keke moul eris ran matien. Ka munak sakien koanek hekur out, liluvosien ekor enek hetisa helohlin liluvosien koa mulamu navong kei vit vi Kristo onen Ahi.”65Navong asuv Paelet longe, maeni vit, “Tahos, mihekur vangi meatin tavaeen tai onak keke avalei kokoe revi en valengeihat enek musil sakien koa kami emivati.” 66Sakini keil uva ral min meatin tavaeen keil, aling siil vating koe voiteh teni, ka aling vangi meatin tavaeen keil alei kokoe.
Copyright information for
PMA